فاكسات مهاجر

الشعب المصري:
عيب عليكم في عيد ميلاد الريس تلبسوا أسود، ناقص في عيد جوازه تطلعوا القرافة.
• جمال مبارك:
بترضي الأقباط وتذهب لكنيستهم لتهنئهم بعيد الميلاد، وترضي الإخوان بعدم ذهابك في عيد القيامة.
• أحمدي نجاد:
كل ما أشوفك أتمنى أحضر لك مؤتمر صحفي واحد وأسال سؤال واحد، تعرف تعجن لي عجين الفلاحة؟
• اللواء حبيب العادلي:
عملتوا إيه في إسراء عبد الفتاح؟ البنت بعد الإفراج ما بتجمعش.
• أبونا صليب متي ساويرس:
لما حد يصرح تصريح ما يعجبنيش بخبطه مقال وارتاح، وكل ما قدسك تدلي بتصريح بخبط راسي في الحيط. يا تري ده مريحك؟
• مهدي عاكف:
لو كنت تعرف معنى كلمة وطن، لعرفت معنى مصر أولاً.
• إسراء عبد الفتاح:
بعد إللي حصل لك بادور على حد ياخد باله من العيال، لو مالقيتش هبطل كتابة.
• هالة البشلاوي:
لبستونا العمة في مصر وعايزين تلبسوها لينا في كندا وللكنديين كمان! هأ هأ سلامات.
• مانويل جوزيه:
عايز الصحافة المصرية ترضى عنك وحتى من غير ما تاخد ولا بطولة!؟ قول الشهادتين وتوكل على الله.
• الفنانة صباح :
مبروك الجواز التاسع، وأنا باموت في رقم عشرة.
• الرئيس مبارك:
أدي آخرة الانشغال بمشاكل أخونا شعيط وأخونا معيط، شعبك بيتشري رغيف العيش بالتقسيط.
• مطار هيثرو:
إصراركم على عبور البابا من بوابة فحص المواد المعدنية إهانة لمصر كبلد وللأقباط في كل العالم.
• أحمد عز:
أقباط أسيوط بيقولوا كل إللي نقول عليه غزال يطلع قرد.
• المعارضة المصرية:
قلنا لكم الإخوان المسلمين غدارين، طول عمرهم غدارين كدابين حتى لو حلفوا ميت يمين.
• الإخوان المسلمين:
بعتم المعارضة في صفقة مشبوهة مع الحكومة ولم تشاركوا في الإضراب، بانوا على أصلكوا بانوا.
• صدام حسين:
وإنت عايش كنت كل ما تكح يصيب فهد إسهال، وبعد إعدامك حرمت النوم ع القذافي، كل يوم يصحى علي كابوس متعلق في المشنقة.
• السفير المصري بكندا:
لما تنزل مصر إكنس السيدة والحسين على شريف منصور وماجد الشافعي إللي قطعوا أكل عيشك من كندا.
• أبونا بيشوي:
كنيسة قبطية متعددة الحضارات، ممكن تضم معاك الصعايدة بشرط ما تحطناش في آخر القائمة.
• أحمد سعيد:
في 5 يونيو 67 كان فيه أحمد سعيد واحد، وفي 6 أبريل 2008 كان فيه ألفين أحمد سعيد.
• حسام حسن:
وإنت لاعيب كنت مشاغب وكان الأهلي وجمهوره بيحموك من العقوبات، وإنت مدرب عايز تشاغب انضم للحزب الوطني أو الإخوان.

يرسلها: مدحت عويضة
Medhat-eweeda@hotmail.com